近排天氣開始秋涼，最啱就係去郊遊啦！嚟到濕地公園，喺濕地保護區行吓沼澤、泥灘、紅樹林，再睇吓濕地生物，玩咗成日真係又攰又肚餓。好彩喺濕地公園隔籬就有一間任飲任食嘅至尊雲吞麵雞煲，好味之餘，價錢又夠晒親民呢！
麻辣雞煲
天水圍至尊雲吞麵雞煲用咗新鮮辣椒，加上大量芫荽、洋葱同各種香料炒香，雞件索晒辣汁，夠晒惹味。我哋叫咗小辣，唔算太辣，鍾意食辣嘅朋友不妨由中辣挑戰。雞件大小適中，非常新鮮，仲可以無限添加雞肉。
火鍋配料
配料多達50款，真係花多眼亂，最正嘅當然係鮮牛肉同肩胛肥牛片，兩款牛肉都新鮮嫩滑，肉味香濃。脆鯇片、鵝腸同牛柏葉等火鍋都係必叫嘅配料，同樣夠新鮮，索晒湯汁就最惹味。雖然係任叫任食，但火鍋配料嘅質素都唔會將貨就價！
炸饅頭
以為呢度最出名嘅係雞煲，咁你就大錯特錯喇！炸饅頭係至尊雲吞麵雞煲嘅其中一款必點食物，差唔多每一檯都叫嚟食。炸饅頭外脆內軟，加埋煉奶，簡直係畫龍點睛，真係都忍唔住encore多碟！
