【A&M Diary】今日A姐有大會開，無得放假，得返我一支公，好可憐呀！(唔好同A姐講，其實不知幾開心，可以休息下，甩難！)既然係咁，當然要善用呢個「真•放假」，瞓到自然醒，再打下機，不過都要醫肚嘅！嚟到尖沙咀嵐橋丼飯專門店，午餐有一個足料丼飯之外，仲有沙律、關東煮同味噌湯，唔錯喎！
沙律 + 關東煮 + 味噌湯
沙律新鮮冰凍，沙律菜爽脆，粟米車厘茄鮮甜多汁，非常清新，開胃一流！味噌湯好香昆布味，仲有好多豆腐，入口香滑。關東煮一啲都唔馬虎，大根煮到入晒味，飲埋關東煮啲湯，正！
嵐橋丼
主角終於到啦！嵐橋丼有中拖羅、三文魚、深海池魚、白身魚、日本牡丹蝦、三文魚籽同松葉蟹鉗，份量十足，非常豐富！深海池魚肉質細緻爽口，味道甜美；牡丹蝦鮮甜黏口；三文魚肥美厚肉；中拖羅油脂分佈平均，魚油味重；三文魚籽晶瑩剔透 、粒粒飽滿！大家可以揀赤酢壽司飯或者令和口味壽司飯，我就揀咗赤酢壽司飯，有淡淡的壽司醋味！
