【A&M Diary】想食到食物嘅原味道，最好就係蒸，而且蒸嘅烹調方法相對健康。不過蒸絕對唔係海鮮嘅專利，蒸牛肉同蒸蔬菜都可以好好味。今日我哋就去到北角嘅北角匯，試吓野郎蒸。野郎蒸主打沖繩木盒蒸，將新鮮嘅食材放入木盒內蒸，蒸完後加少少調味就食得，新鮮又好味。
美國牛肉片蒸籠定食
蒸大概5分鐘就食得，我哋叫咗美國牛肉片蒸籠定食，牛肉份量好多，大概有8大片，牛肉蒸完後，仍然好嫩滑。蔬菜有蕃茄、菇、紅蘿蔔、椰菜絲，蔬菜索晒牛肉嘅精華，好香濃入味。店員建議我哋將牛肉包著蔬菜，加啲胡麻醬就食得，入口層次豐富，好新鮮，好好味。至於，定食仲有包湯同飯，夠晒飽。
石燒牛柳
除咗蒸，呢度仲有石燒！你可以根據個人食量選擇份量，我哋就叫咗牛柳，牛柳軟腍，肉味香濃。上枱時記住要先切開，靠石板嘅溫度燒熱塊牛柳，當然生熟度可以按個人喜好，好似我想要3成熟，而A姐鍾意5成熟，就要自己留意火喉喇。
