【A&M Diary】為何深夜總是餓？講到港島區掃街食宵夜嘅地方，又點少得太安樓呢？太安樓有港版士林夜市之稱，呢度嘅港式小食選擇好多，絕對係港島區掃街食宵夜嘅集中地！我哋就揀選咗8個太安樓必食嘅宵夜推介小店俾大家，等大家食飽飽再瞓個靚覺啦！
1. 太安樓夜市8大宵夜必食推介：林記車仔麵
地址：西灣河筲箕灣道57-87號太安樓地下A12舖
夜晚食碗熱辣辣嘅湯麵，真係好有幸福感呀！位於太安樓嘅林記車仔麵已經超過30年歷史，價錢親民，最出名係又香又辣嘅辣椒油！我哋宵夜就特別鍾意食車仔麵，因為如果宵夜唔太肚餓，就可以食少啲，純粹滿足一吓空虛嘅胃。
2. 太安樓夜市8大宵夜必食推介：姊妹美食
地址：西灣河筲箕灣道57-87號太安樓地下A35A舖
喺太安樓見到最多人圍住嘅舖頭，非姊妹美食莫屬。姊妹美食嘅最大賣點係選擇超多，煎釀三寶、炸大腸、炸大雞髀、炸魷魚、炸薯條、天婦羅、炸帶子等等，全部即叫即炸，新鮮熱辣，雖然罪惡感爆燈，但絕對係宵夜嘅最佳美食！除咗炸嘢之外，姊妹美食仲有碗仔翅、燒賣、魚蛋、生菜魚肉、雞蛋仔等港式經典美食。
3. 太安樓夜市8大宵夜必食推介：娥姐粉菓
地址：西灣河筲箕灣道57-87號太安樓地下A01舖
因為傳媒嘅報道，所以娥姐粉菓嘅知名度好高！呢度嘅粉菓確實皮薄餡靚，隻隻都晶凝通透，非常有口感，食嘅時候，我就鍾意加少少辣椒油，就更加惹味啦！不過，除咗粉菓之外，其他嘢食都可以忘記呀，哈哈！
4. 太安樓夜市8大宵夜必食推介：太安樓牛雜
地址：西灣河筲箕灣道57-87號太安樓第二街A31B號舖
太安樓嘅牛雜絕對唔可以錯過！！呢度嘅牛雜分為大、中、小，三個size，牛雜有牛筋、牛潤、牛肺、牛腩、牛肚、牛膀等，所有嘢食嘅味道都勁濃郁，仲有淡淡嘅花椒八角香味，如果有啲咩唔食嘅，記住提早出聲呀！另外，仲可以加埋豬腸、豬皮、蘿蔔同柚皮，當中蘿蔔同柚皮絕對唔可以錯過，蘿蔔勁鮮甜，柚皮索晒牛雜嘅精華，真係無得頂！
5. 太安樓夜市8大宵夜必食推介：魚蛋佬
地址：西灣河筲箕灣道57-87號太安樓地下A28號B舖
講到太安樓嘅人氣長龍小食店，又點少得魚蛋佬呢！食物選擇唔算太多，除咗魚蛋，仲有腸仔、齋、芝士腸、牛丸同牛柏葉。魚蛋佬最出名嘅係佢嘅沙嗲醬，醬汁濃郁，非常惹味！當中魚蛋同牛柏葉就最索汁，唔可以錯過！
6. 太安樓夜市8大宵夜必食推介：沙嗲佬
地址：西灣河太安樓地舖A28C
話明宵夜，就梗係無咁早開門啦！沙嗲佬通常夜晚九點半後先開門，呢度嘅串燒用炭爐燒，配上濃郁惹味嘅沙嗲，食物仲有炭香味添！串燒選擇有牛肉、豬肉、雞肉、雞腎、雞中翼、紅腸、香腸等，全部即叫即少，所以建議大家第一站可以先來沙嗲佬落咗order先喇！
