【A&M Diary】香港雖然係一個商業金融中心，但都有好多出色運動員，其中單車項目喺亞運會同奧運會屢獲佳績，出產唔少運動明星。除此之外，喺新界地區亦設有多條單車線，令踩單車成為唔少人放假嘅消閑活動或代步方式。今日我哋就嚟到將軍澳嘅單車館公園，呢度除咗可以租架單車，遊走將軍澳嘅單車徑之外，亦設有世界級單車場館同極限運動，啱晒大家嚟放電同出身汗啦！
提提你
香港單車館內嘅室內賽道，並不開放讓市民踩單車；而單車館外嘅公園亦不是單車徑。所以想踩單車嘅，可以去返附近嘅將軍澳單車徑。
香港單車館
喺公園入面，最吸晴嘅當然係鵝蛋形設計嘅香港單車館啦！當年香港因黃金寶喺2006年亞運會上贏得兩面金牌，令香港掀起單車熱潮。而政府為加強推廣單車運動，斥資超過11億港幣興建呢個場館。單車館鵝蛋形嘅外型，原來設計理念源自於單車嘅頭盔，館內設有室內單車賽道，更多次舉辦單車比賽。
單車館設施
除咗單車賽道，館內仲設有多用途球場、舞蹈室、健身室、兒童遊戲室等設施。館內仲有體育用品店、餐廳同租借單車服務。
另外，場館內外都擺放唔少香港嘅單車展品，可以了解香港單車運動嘅發展同歷史。
驚喜係香港主辦2009年東亞運動會嘅吉祥物，喺呢度都見得到。
將軍澳單車館公園
設有緩跑徑、攀石牆、兒童遊樂場、長者健體設施、人工湖、中央草坪同模型船池。但公園內最特色嘅就係極限運動場，可以喺呢度玩滑板同X-game。不過，今日嚟到見到最高難度嘅區域就未有開放。
