【A&M Diary】今日要介紹嘅呢間自助餐，無魚生、無牛扒、無生蠔亦都無甜品，但佢有嘅係良心！位於新蒲崗彩虹道熟食中心嘅順豐良心飯店，一直以嚟只做午市嘅港式自助餐，每位$32就可以任食小菜、白飯同例湯，係唔少藍領及弱勢人士嘅飯堂。
俾咗錢之後，老闆娘就會俾一隻碟同一個碗你，食幾多就攞幾多，千祈唔好浪費。估唔到呢個價錢嘅飯又相當唔錯，夠熱又軟綿；至於今日嘅例湯係菜乾豬骨湯，湯無味精，夠足料。
雖然價格超優惠，但唔好以為呢個價錢就係齋菜為主，都有好多肉㗎！而且小菜選擇都唔少，每日嘅款式都會有所不同，是日菜單就有：生炒骨、蕃茄炒蛋、炒通菜、炆蘿蔔、咖喱薯仔豬扒、紅燒豆腐、西檸雞、炸魚、蒸魚、炒椰菜、蒸南瓜同鹹蛋蒸肉餅等等。不過，由於小菜下面並唔係熱爐，所以有唔少餸菜放得耐都會變凍，但味道絕對唔差，絕對係物超所值嘅選擇！
