【A&M Diary】疫情期間，A姐日日都鑽研廚藝，煮咗好多好好味嘅家常小菜，但係佢嘅西餐技術仍然處於地獄廚神水平（我今晚又要跪玻璃喇）！食咗咁耐住家中餐，都想轉下口味食下西餐，一於叫外賣返屋企食啦！今次我哋選擇位於灣仔嘅人氣餐廳The Pawn，同A姐食番個住家燭光晚餐。
自家製酸種麵包配牛油 Homemade sourdough with whipped butter
一坐低當然就係上咗個麵包先啦！雖然喺屋企，燭光配埋音樂，夠晒情調，但衣着方面，竟然係睡衣，即刻由幻想嘅童話世界，返到嚟現實嘅屋企喇！哈哈，講返啲食物先。我哋叫咗個三道菜套餐，包括：自家製酸種麵包、烤雞肉凱撒沙律、烤鴨胸配煎炒蘑菇及松露薯蓉同朱古力布朗尼。雖然外賣運送需時，但係酸種麵包仍然夠晒脆，特別鍾意酸種包嘅氣泡感，再加上淡淡酸同酒味，好有層次感，配埋牛油，真係Perfect！
烤雞肉凱撒沙律 Grilled chicken caesar salad
沙律菜新鮮爽口，加上沙律醬汁，好match呀！雞肉份量一啲都唔少，雖然係雞胸，但係一啲都唔嚡口，仲有好多肉汁！
烤鴨胸配煎炒蘑菇及松露薯蓉 Pan seared duck breast, sauteed mushroom and truffle mashed potatoes
鴨胸夠晒嫩滑，鴨味香濃，蘑菇特意用較少嘅調味，突顯蘑菇原有嘅香味。薯蓉有淡淡嘅松露香味，又滑又creamy。
炸海鮮拼盤 Fried seafood platter
食外賣最驚係啲食物經過運送時間唔夠新鮮熱辣，而當中炸嘢係最大危機。呢個炸海鮮拼盤仍然夠脆夠熱！拼盤有炸蠔、炸帶子、炸蝦、炸魚，款款都有兩件，同A姐一人一份唔使爭，其中隻炸蠔真係又大又鮮甜！
蘑菇松露扁意粉Linguine mushroom with black truffle and aglio e olio
呢個蘑菇松露扁意粉，用上蘑菇、松露、蒜油製成，意粉炒得乾身彈牙，同時充滿蘑菇同松露嘅香味，好滿足。
