【A&M Diary】我哋嘅週末自駕遊又出發喇！今日嚟到香港北區嘅邊境地帶，遊走2013年6月10日先開放嘅禁區範圍。正式出發前，梗係要醫咗個肚先啦！而每次去郊區，總會有一間士多，等郊遊人士可以補給，所以我哋嚟到位於上水河上鄉嘅鴻淘士多•羅太豆花啦！
豆腐花
雖然近期天氣炎熱，但呢度無提供凍豆腐花。熱嘅豆腐花反而顯得豆味香濃，更加重要嘅係豆腐花超滑！
豆漿
想要凍嘅，可以選擇豆漿，豆味同樣香濃，入口滑溜，重點係唔會太甜，消暑解渴一流。
豬扒一丁
除咗豆類製品，呢度都有熱食供應，有燒賣、魚蛋。但我哋今日就叫咗出前一丁，配菜可以選擇餐肉蛋或牛腩，而我哋就揀咗最邪惡嘅豬扒。豬扒煎到好香，夠入味。不過，人就比較多，建議嚟到第一件事，order 咗熱食先。
