【A&M Diary】坐完昂坪360嚟到昂坪，除咗參拜天壇大佛同寶蓮襌寺，不如行多15分鐘，嚟埋心經簡林啦！呢度刻有《心經》嘅文章，背山面海，心情好平靜舒暢，而呢段路程以平坦石屎路為主，絕對輕輕鬆鬆就可以睇到靚景喇！
一路上都有好多路標同指示，一定唔會迷路。心經簡林由38條8至10米長、1米寬、重4-6噸嘅木柱而成，配合山形地勢以∞的形狀排列，木柱上刻有由饒宗頤教授用隸書寫成嘅《心經》。見到一支又一支嘅木柱，不禁想像當年係點樣興建。睇番資料，由於呢度無行車道路，所以要使用特別設計嘅重型運輸車輛運載，而且更加要保育附近嘅生態地區，所以建築係有一定困難。深深感受到前人種樹，後人乘涼嘅道理。
心經簡林於2003年籌辦準備，喺2004年9月動工，至2005年5月完成，耗資950萬港元。
《心經》嘅梵文全名係《般若波羅蜜多心經》，代表梵文入面嘅智慧同圓滿，其實經文是由唐朝玄奘法師嘅譯本，亦係儒、釋、道三教所共尊嘅寶典。心經簡林排列成∞，代表生生不息。其中編號23嘅木柱，刻意留白，象徵《心經》「空」嘅意義。
亦有人講過，心經簡林係風水陣，鎮壓守護鳳凰山嘅神靈鳳凰。唔知你有無其他領會呢？
