【A&M Diary】根據《基本法》第二十七條規定：「香港居民享有言論、新聞、出版的自由，結社、集會、遊行、示威的自由，組織和參加工會、罷工的權利和自由」。而無國界記者組織（RSF）發布嘅世界新聞自由指數，香港由2002年嘅第18名，至2020年已下跌至第80名，究竟香港嘅傳媒定位、新聞價值以及歷史地位係點呢？今日我就同A姐嚟到香港新聞博覽館（舊址為必列啫士街街市），如果帶埋小朋友嚟，更加可以從參觀學習，了解一下香港嘅新聞發展啦！
香港新聞博覽館前身為必列啫士街街市，以包浩斯風格設計，樓高兩層設有26個魚類及家禽檔位、33個肉類及蔬果檔位，係香港三級歷史建築。後來活化成香港新聞博覽館，更加係亞洲首間以新聞為主題嘅博物館。館內除咗介紹香港新聞，亦有保留街市原有嘅「劏雞房」同「豬肉枱」。
一入到嚟博物館，就被「當記者要有所為，更要有所不為」呢句說話所感動！
常設展覽廳
樓高兩層嘅香港新聞博覽館，分為唔同部份：報紙、電台、電視、資訊抗疫症、新媒體、財經新聞、香港新聞業百年變遷、娛樂、體育及賽馬新聞、新聞體驗區、香港新聞博覽館的誕生、當日頭條今日歷史、孫中山先生與此地結緣等。
報紙
當時好多嘅報館同印刷公司都喺必列啫士街街市一帶，包括：《南華早報》、《中國日報》、《華僑日報》、《工商日報》、《大公報》、《新晚報》、《文匯報》等，而香港第一份華人資本嘅報紙，就係1874年創刊嘅《循環日報》喇！喺當年資訊未係咁流通嘅時候，當年除咗有中文或英文嘅日報，更設有晚報同號外，以發送最update嘅訊息。聽就聽得多嘅執字粒，呢度都有介紹，真係嘆為觀止！聽導賞員講，原來做執字粒嘅員工，可能小學都未畢業，字都唔係識幾多個，但又要喺時間唔多嘅情況下，喺密密麻麻嘅字庫中，執好字粒再趕住去印刷。而佢哋雙手都會充滿黑色油墨，所以行內被稱為「黑手黨」。
電台
細細個唔知你哋有無聽住收音機瞓嘅習慣呢？香港嘅電台發展由AM頻道，至FM頻道，到依家嘅數碼頻道，頻道選擇都唔少㗎！
電視
香港新聞博覽館展出唔同電視台嘅咪，包括無綫電視、有綫電視等等，甚至永恆嘅亞洲電視同已結業嘅佳視都有。而當年嘅攝錄器材原來係咁大部架，真係辛苦一班新聞從業員喇。另外，考吓你，知唔知香港首次做現場直播嘅新聞又係邊次事件呢？（想知就去參觀香港新聞博覽館啦）以當年嘅科技，原本做現場直播嘅器材，係咁大部㗎！
