【Now.com生活】曬黑、出斑就去坊間買美白精華、面膜？不如跟註冊中醫曾覺知醫師自製又平又天然嘅美白淡斑花茶面膜啦！事關你飲完花茶，仲可以用嚟敷臉！敷完可以美白淡斑，令肌膚變得水潤，改善面色！
花茶材料如下：
珍珠母（打碎） 20克
玫瑰花 5-7朵
菊花 6克
茯苓15克
紅棗 5粒
只要將以上藥材加2碗半水煲30分鐘，花茶即成。嗜甜嘅朋友更可加適量蜜糖！
下一步就係將花茶變成面膜！
1）將花茶材料翻煲一次
2）將藥汁浸濕面膜紙
3）暖敷臉上10分鐘
最後以清水徹底洗淨，並進行肌膚日常護理，
呢個「平、靚、正」嘅美白工程就大功告成！
曾醫師解釋中醫認為多數色斑為痰、淤、濕、毒等邪氣淤積皮膚表皮，就會出現常見嘅有黃褐斑同雀斑。
另外，佢建議想美白嘅女士，應多進食含豐富維他命 C嘅食物，例如綠葉蔬菜、檸檬、蕃茄、柚子、柑橘等。同時，應減少食刺激性食品，如酒、濃茶、咖啡等。
