【Now新聞台】截至早上11點止，1小時內《彭博》用戶關注度上升最多的港股，依次爲高鑫零售、華潤置地、新城發展、時代中國控股、龍湖集團。
高鑫上半年收入、純利按年都要倒退，前者跌5%，後者更大減86%。阿里巴巴係高鑫大股東，阿里股價今日有得升，但高鑫畀業績累，股價暫時連跌兩日，今朝一度大冧超過13%，走勢更明顯轉差，喺缺乏利好因素下，係咪要避開？
京華山一國際研究部主管彭偉新指，缐下銷售部分出現負增長，明顯拖累整體表現，因為發展缐下銷售嘅資源愈嚟愈少，加上阿里舊年10月入股後，除咗初期為股價帶嚟刺激作用外，之後一直係咁跌，雖然跌到咁殘，但仍然吸引唔到投資者重新吸納，相信公司要將專注力放喺線上業務，同埋改變發展方向，股價先有機會升返。
