為達至最佳瀏覽效果，請更新至最新的瀏覽器版本。
如有問題，歡迎電郵至 pccwmediaiapps@pccw.com 查詢。
【Now.com】樂壇天后容祖兒（Joey）近年將工作重心轉移至內地市場，相隔3年，Joey昨日（29日）再次推出全新廣東歌！容祖兒今年首支派台作品《九秒九》昨日上架，歌曲找來黃偉文（Wyman）填詞及湯令山（Gareth. T）作曲。新歌延續了Gareth. T去年派台作《緊急聯絡人》的故事，新歌MV中Joey更首次挑戰「一鏡到底」！
去年 Wyman 及 Gareth. T 創作了人氣廣東歌《緊急聯絡人》，故事講述男方將前度名字填在「緊急聯絡人」一欄。今次Joey的新歌就延續故事，由女方角度呈現出如何徬徨焦躁準備這趟「特急行程」，可謂是《緊急聯絡人》下集。Joey透露，概念由Wyman促成：「因為佢係《緊急聯絡人》嘅填詞人，當我俾咗Gareth呢個demo佢嘅時候，佢好快就話俾我聽『不如我哋就寫《緊急聯絡人》嘅下集。』由我作為第一身去講番嗰件事、嗰個感受。」
容祖兒又透露在樂壇的每個階段都有很欣賞的音樂人，上一個是方大同，近年就喜歡Gareth. T：「呢幾年每一次聽湯令山嘅新歌，我都可以無限循環咁樣去聽，無論佢嘅melody同埋演繹，對我嚟講好有feel，所以今次做新碟第一個想合作嘅人就係Gareth，咁就搵佢啦。」
除了作曲，Joey亦邀請Gareth. T 於MV客串的士司機一角，「佢嘅MV都係佢嘅創作嚟嘅。所以我話：『我今個MV可唔可以邀請你參加呀？你啲MV成日都有你啲朋友，我可唔可以邀請你？』佢話：『ok㗎，我可以㗎。』然之後佢就喺入面飾演一個角色。」
今次MV採用「一鏡到底」的拍攝手法，首次面對的Joey坦言充滿挑戰性，腦海中飄過各種走位細節。MV 又請來舞台劇演員、風車草劇團創辦人之一的邵美君導戲，祖兒謂：「有兩個單位我好多謝嘅，第一次合作嘅導演Maggie同埋邵美君老師。好耐之前我已經同邵美君講，好想跟佢學演戲。雖然最後冇成事，但今次MV Maggie幫我搵咗美君，我哋一拍即合！喺佢嘅指引底下拍咗呢個MV，個感覺好安全、好有信心，希望大家都會喜歡呢個MV啦。」
