【Viu】Rachel梁雍婷憑《白日之下》奪得「最佳女配角」，佢笑認喺台上好激動，所以踢跌咪，仲搞Gag話：「今次真係名留青史喇！」Rachel希望觀眾睇完電影後會去了解現實中發生過嘅事，防止同類慘劇再發生，仲語重心長咁話：「白日之下依然有黑暗存在！」
至於憑《12.12:首爾之春》奪「最佳男配角」嘅朴勳，直言冇諗過攞獎，喜出望外，仲分享準備角色嘅方法係多啲留意身邊嘅人事物，培養觀察力。
而憑《年少日記》膺「最佳新導演」嘅卓亦謙，同樣指得獎係殺自己一個措手不及，所以只係準備咗簡單致謝詞，連受訪都緊張到胃痛！卓亦謙又親解早前炒單車撞欄，搞到右手打石膏，如果唔係及時跳開就會頭落地，未必有機會活生生拎獎，好彩大步檻過咋！
