【Viu】話咁快又到4月，即係代表「姜濤生日慶典」又嚟啦！官方後援會精心設計多個生日應援站，畀姜糖打住卡咁同姜Admin慶祝25歲生日！今日率先帶大家去到尖沙咀、銅鑼灣呢兩站兜個靚圈，掃吓啲打卡位先啦！
尖沙咀以藍色做主調，展現姜man沉穩魅力一面！一共有6個打卡位，最最最特別係正中間嘅《黑月》姜濤，個size係一比一㗎！呢個真心要集郵！而姜濤身後嘅燈柱仲隱藏咗個小秘密添，就係「Happy Birthday」嘅音頻，好似圍住姜濤唱生日歌咁，超有心思！一如以往都有DIY區，今年就係整卡片套、小袋，可以畀姜家人發揮創意！仲有紀念品區，小心買到破產！
跟手直落銅鑼灣站，成個setting明顯由型格路線轉cute cute路線！派出小姜姜、小濤濤帶大家under the sea，展開浪「濤」之旅！呢站最正嘅係有甜品站，打卡打到餓就可以即場醫肚，勁貼心！姜家人仲可以報名參加針織工作坊添！值得一提嘅係，每站都會派發專屬閃卡，記得去齊咁多站啦！
現場見有姜糖帶埋小朋友嚟朝聖，分別有母子檔Anna x Antonio同母女檔Mandy x Everly！兩位媽媽都笑話自己鍾意姜濤先，然後再帶小朋友入坑，並指爸爸都係姜糖之一，一齊聽歌、幫手排隊攞應援物，係愛呀！佢哋不約而同大讚姜濤顏值爆燈、有才華、為人真誠、孝順、係好榜樣等，啲優點簡直數都數唔晒！即刻去片睇吓姜濤生日慶典有幾咁盛大啦！
