【Viu】郭富城今年重啟世界巡迴演唱會，早前完成美加站，而家6月佢已展開第二階段巡唱，新加坡就係首站，今次係城城相隔8年再喺當地舉行個唱，門票一開賣即被秒殺！舞台上，城城先以經典快歌《唱這歌》炒熱氣氛，為演唱會揭開序幕！咁耐冇見新加坡歌迷，城城即刻施展冧功：「好掛住你哋，8年啦！你哋好嗎？」仲大讚當地fans熱情又長情，指自己去到任何一個城市演出，都會見到新加坡嘅歌迷，搞到台下個個鬼咁冧啊。
其後城城更分別唱出《我為何讓你走》、《有效日期》，令全場氣氛再度升溫！但講到經典歌啦喎，當然唔少得情歌《愛的呼喚》啦，fans更舉起手機燈，形成一片燈海，場面非常壯觀！
今次城城喺新加坡都品嚐到咗地道美食，但可惜未有機會食到榴連，而疼鍚囡囡嘅佢亦特別購買新加坡特產「綠色」蛋糕返港做手信，真係sweet到爆啊！
