【Viu】由郭富城、GiGi梁詠琪、鮑起靜、Natalie許恩怡、譚耀文、鄭丹瑞、范麒智等所演出嘅新戲《無名指》，今日舉行開鏡拜神儀式。其中城城、GiGi喺戲中飾演兩公婆，原來今次先係佢哋正式合作嘅一次，直言感情戲份好重、有挑戰性，特別係掉低個女唔理呢part好不負責任，因為喺現實兩位都係「寵女狂魔」，要更加多時間去醞釀情緒。笑問呢排返屋企係咪要同啲女隔離？城城大笑話拍完會9秒9跳出角色，見到對女不知幾開心！而問到GiGi會唔會怕角色令觀眾反感？佢話唔會，又透露一煞科就會全程投入排練紅館騷。
提到城城起訴廣州公司侵犯肖像權僅獲賠100萬，佢指事件交由公司處理。另外，香港殿堂級音樂家顧家輝日前喺溫哥華離世，兩位指由細到大都有聽對方嘅作品，並謂顧嘉輝逝去係大家嘅損失。
至於鮑姐、Natalie就演兩嫲孫，鮑姐笑指Natalie唔似媽媽柏安妮咁斯文，但就活潑、得意，都好期待同框。戲中Natalie自細患重病，又要同城城對戲，佢笑話都有啲緊張，講到佢繼張家輝後再同城城合作，Natalie話覺得好幸運，但愈幸運就愈大壓力咁喎，好彩有媽媽幫手對戲。
