【viu】GiGi梁詠琪、Fish廖子妤、Jennifer余香凝同Yanny陳穎欣今日出席品牌活動，曾經合作《骨妹》嘅GiGi同Fish、Jennifer喜相逢，GiGi同Jennifer傾BB經；Fish就化身迷妹影偶像，仲希望可以同GiGi再合作拍戲或者合唱，好期待喎！
之前去咗台灣拍劇3個月嘅GiGi，坦言唔會再離開囡囡咁耐，頂盡一個月，但如果係同韓星合作，相信阿女就會開綠燈喇，事關Sofia好迷BLACKPINK，一家三口會喺屋企勁歌熱舞㗎！
此外，Yanny就大方分享素顏落街被偷拍嘅慘劇，仲自爆試過搭的士瞓到流口水，女神形象蕩然無存呀！講到《試當真》校花校草嘅心水，佢睇好何求，大讚佢搞笑兼有自信，識嘢喎！
