【Viu】樂隊RubberBand孖老友「小明」方皓玟噚晚喺亞博開咗場《MOOV Live RubberBand x 方皓玟》音樂會，以靚聲震懾萬幾位fans對耳仔，女團COLLAR成員Winka、芯駖都有去捧場！唔講唔知呀，呢次係RB同小明相識10年後首個合體騷，小明感謝RB就好似大哥哥咁一直守護自己，由麥花臣走到紅館。
自封「全港最易喊主音」嘅6號，失守哽咽咗兩次，仲自爆喺總綵排嗰陣聽到小明唱歌突然飲泣，要幾個人遞紙巾，佢直言小明嘅歌力量好大，並寄語對方要寫多啲歌畀香港人，又講到雖然平時成日合作，但合體開騷真係唔係老奉，喺呢兩、三年相聚亦唔係易事，所以寧舍感觸！
講到RB同小明分別入圍《叱咤》我最喜愛的組合、女歌手最後五強，小明指每一票都唔係必然，係一份厚重嘅禮物；至於RB就謙稱入到五強已經好感恩，爆笑自嘲係「中坑」睇化晒，因為都知道誰勝誰負咁喎！另外，RB仲分享泰國錄音趣事，講返當時大家一錄完音就即刻除淨條底褲跳落泳池，但後來先發現錄音室主人唔係成日清潔個池，仲有狗仔喺度小便添！真係笑死啊！
