【Viu】林家謙處男紅館騷喺加場兼颱風「馬鞍」襲港之下，噚晚迎來「真·尾場」！喺樂壇人面極廣嘅家謙，最終回加碼邀請多位歌手朋友上台，打頭陣有遠道由加拿大、足足用咗48個鐘先返到嚟香港嘅「黃碼」人士鄧小巧！接住落嚟就有撐足7晚嘅Serrini以魚網絲襪俏Miss look現身，再搵嚟老友Tyson Yoshi幫拖，一嘢公主抱起家謙！再先後有陳蕾同壓軸出場嘅樂隊RubberBand，主音6號搞笑叫同係處女座嘅隊友泥鯭、阿正同家謙組隊，泥鯭腦筋急轉彎提議叫「處女時代」，仲即時諗埋首支派台歌叫《小器簿》，真係俾佢哋笑死啊！
而最後家謙喺encore環節透露心聲兼再淚灑舞台，自爆今次開騷壓力山大，就算臨開騷兩星期前都諗住取消，練歌嗰陣又零自信心，好彩有身邊嘅朋友鼓勵，就連林夕都打電話支持佢，大家先有呢個咁完美嘅騷睇咋！騷後家謙受訪感謝各位嚟撐場嘅歌手朋友，竟然摵甩mean mode話最深刻係嚟「搞搞震」嘅Serrini，之後會送「包包」慰勞佢。就嚟生日嘅家謙話開紅館騷係最好嘅生日禮物，會喪食雪糕慶祝，希望之後仲keep得住啲肌肉同26吋腰！
