【Viu】 「華納三寶」MC張天賦、Kaho洪嘉豪同「豹哥」陳蕾，噚日合體為時裝品牌造勢，講到豹哥就嚟孖Yoyo岑寧兒開騷，佢都話好緊張賣飛，又順便澄清個騷只咁啱喺聖誕節舉行，所以並非一個淨係唱聖誕歌嘅音樂會：「或者可能得我一個有誤會過⋯」咁樣會唔會太搞笑？「賦豪CP」聽到就即刻自薦合唱歌《聖誕很忙》，轉數咁快真係唔做sales都徙晒！
同場仲有Stephy鄧麗欣，主演電影《飯戲攻心》票房繼續上升，佢笑話再冇票房壓力，依家每多一蚊都係bonus，又指期待其他成員輪住「找數」，並搞笑呼籲網民唔好再要佢「找數」，因為連找兩鑊好唔公平：「（泳衣相）個解像度都幾高㗎！zoom完都幾清楚！」講起前Cookies隊友兼好友蒲茜兒（Serena）自爆離婚，Stephy指唔想打攪對方消化情緒所以最近冇聯絡，睇吓遲啲有冇機會見面。
至於P1X3L就預告好快出新歌，仲有機會喺嚟緊月中嘅大型戶外音樂會上獻唱添！提及師姐Jace陳凱詠爆被環球雪藏兼明年離巢，三子明顯懵然不知，但揚言會繼續支持對方：「同我哋一樣默默努力。」
