【Viu】港產科幻片《明日戰記》又有好消息啦，今日(2號)公布票房已經衝破6,500萬港元，誓要為香港電影華語片寫下新一章歷史！而戲中一眾演員繼續馬不停蹄謝票，今日古天樂、劉嘉玲、姜皓文、朱鑑然、吳肇軒和羅浩銘齊齊去到尖沙咀唔同戲院同觀眾見面，有觀眾指自己已經睇咗25次！電影上映六週依然有咁多朋友支持，古仔都相當感動，希望可以破香港電影史上華語片第一位，票房衝破7,000萬。
其實今次係嘉玲姐首次謝票，就連古仔都講笑話佢人生第一次謝票，嘉玲姐對衝破7,000萬票房好有信心，話到時要開香檳兼應該可以分紅，佢仲率先報名拍續集，講明下集一定要有佢份添！而謝票由頭謝到尾嘅黑哥都相信好快就會破紀錄啊。
