【Viu】方力申噚晚出席電台活動，透露早前上ViuTV節目《晚吹 - 有酒今晚吹》飲住威士忌吐真言！佢自爆入行前做運動員係滴酒不沾，係之後先跟Paco學飲酒。另外仲分享咗好多入行趣事同爆料，笑問有冇唔覺意爆情史？小方抵死笑話：「有幾多啫！你哋都知啦！一隻手數得晒！」又話都試吓參加唔同嘅節目甚至係拍劇，自翊同導演馮志強相熟，想舉手演游泳教練！
陳葦璇孖師弟DEZ余宗遙現身，後者預告快將出新歌，MV仲有靚靚女主角，但竟然冇安排親熱戲，葦璇聽見都戥對方唔抵！同場仲有兩位新人Aiden洪助昇、Andy黎展峯，佢哋話雖然最近多咗上台表演機會，但臨上台仍然都好緊張，Aiden仲自爆拍新歌MV跳得太high爆呔，咁隻舞都真係幾激咁喎！
