【Viu】岑寧兒一連四場九展音樂會《Home is...》昨晚來到尾場，媽媽劉天蘭繼續現身撐愛女，同為岑建勳前妻嘅謝寧，亦帶埋父母同囡囡嚟支持，除咗家人，Stephy鄧麗欣、湯令山同女友阿Moon、吳林峰、Cheronna、林嘉欣亦到場欣賞。岑寧兒噚晚不忘為歌迷送上驚喜，邀得好友林家謙擔任表演嘉賓，不過兩位靚聲之人，只係專心唱歌冇講嘢，唱完嗰陣，岑寧兒就輕聲講咗句：「多謝林家謙。」
相反特意喺加拿大返嚟撐表妹嘅Jerald就喺台上「坦白」，佢話呢兩年自己過得very tough:「我覺得自己真係collect skin㗎，你哋唔使tag我話『唔係呀』，我真係collect咗skin，好彩有家人朋友撻返我嘅fire。」岑寧兒話當日佢返嚟香港，感覺到自己係「被歡迎」返嚟：「我想你都有呢個感覺。」兩人肉緊抱抱，之後合唱Swing嘅歌《半張飛》，Jerald話：「我要將呢首歌，送畀Swing嘅Fans。」全場起哄。音樂會最後喺三度Encore下岑寧兒再上台，對歌迷嘅熱情佢受寵若驚，講笑話：「放個假返嚟開Part 2囉！」是咪咁驚喜先！
騷後，岑寧兒受訪話：「佢哋睇騷嗰陣好靜，驚會打搞我，好窩心，until完咗，我見佢哋真係唔想走。」講到表哥Jerald話自己very tough，岑寧兒認為呢兩年，大家都有唔同理由好艱難，但今次邀請佢返嚟，主要係因為返嚟香港開騷對佢哋兩個都別具意義。
至於是咪堅開Part 2？佢話：「我諗吓先㗎咋！緣分嘅嘢，但係我好掛住做表演係真嘅！」另外，媽咪同妹妹等屋企人都有嚟，但係就未見爸爸岑建勳，岑寧兒話：「佢唔喺香港，但係有睇live，其實啲姨媽姑姐都有睇，Daddy話『幾好聲喎！好大膽喎你清唱』，都冇咩特別comment。」
