【Viu】話咁快今日就係夏蕙BB離開香港、移民美國嘅日子，朝早大概11點，佢同老公潘炳烈由囝囝、經理人、契女Amy等陪同現身機場check in。身穿綠色連身休閒裙嘅夏蕙BB繼續化行妝，受訪嗰陣笑話執行李執到今朝，問到係咪好期待飛美國？BB話完全冇，只有滿滿嘅不捨，不過要喊都喊晒，又搞笑自爆其中一件hand carry全部都係化妝品，專登趁噚日last day一早出門掃貨，諗真貪靚！另外仲買咗金鏈仔送畀啲孫添！
一直工作至上嘅夏蕙BB努力做嘢到最後一刻，就算去到美國都會繼續登台，但經理人就笑話全公司上下都開暗盤，賭BB會喺4個月後不甘寂寞嘈住返香港，點知BB就話一唔使隔離就返，同埋明年初新年都一定會返嚟上頭柱香，咁就睇吓下次再見BB係幾時啦～一路順風呀～
