【Viu】Martin王智騫憑住ViuTV青春劇《I SWIM》學霸「阿帆」一角彈起，外表靚仔斯文嘅佢擁有八嚿完美結實嘅腹肌，網民都激讚佢有反差萌，又Cute又Charm呀！Martin中學時期已做model，有唔少拍廣告經驗，前年演出過電影《熱血合唱團》，仲同天王劉德華有對手戲，Martin亦好多謝劉生教佢做戲添。Martin 17歲就開始一邊返學一邊做model，屋企人雖然擔心但都默默支持佢，令佢覺得好warm，可以放心追尋演藝夢。
Martin中學時俾人話似柯震東，而家就似「雕刻美男」李洙赫。如果10分滿分，Martin都好有自信咁話自己都有8分㗎，佢就最鍾意自己嘅眼珠，而望女仔都一樣一定先睇眼珠，好似李嘉欣、徐子淇呢類型嘅女神，就令佢覺得好有幸福感喇。Martin原來細個係肥仔一名，每次身體檢查醫生都話佢癡肥，大個咗就變成肌肉型男，果然肥仔都係潛力股呀！
