【Viu】亞視一姐薛影儀，今日由經理人林寶玉陪同下到機場搭飛機到馬來西亞拍攝節目，同行還有陳美儀、袁群有、梁欣娟及譚夢娜。今次佢哋去馬來西亞會逗留成個月，中間除咗會拍攝亞姐宣傳片外，仲會拍飲食節目同有fans見面會，所以個個都兩、三喼行李，但係第一次出trip嘅阿儀，竟然只係帶咗一個粉紅色hand carry 22吋嘅行李喼，阿儀話：「係囉，佢哋個個都帶咁多，唔使帶咁多啦。」同行團友個個都戰鬥格，帶晒晚裝去馬來西亞，問到淨係帶幾件T-Shirt就飛嘅阿儀，會唔會覺得蝕底？阿儀即刻發揮一姐風範，霸氣咁話：「唔會！」
講到早前被指似小豬羅志祥嘅豬肉分割員威威搞生日見面會，阿儀亦有去現場出席，對此佢解釋：「唔係去見面會，我路過見到有見面會，所以去行吓睇吓。」問到阿儀覺得對方靚唔靚仔，佢就話：「有咩話靚唔靚仔吖。」
身為經理人嘅林寶玉，因為有工作在身而唔可以同行，佢直言都有啲擔心阿儀：「因為要拍電影同廣告，呢兩個job之前因為天雨而押後咗。都會擔心阿儀嘅，所以都叫咗同行嘅工作人員，如果有啲咩事就即刻打返黎香港畀我。」林寶玉話完成手頭上嘅工作之後，就會即刻飛過去會合大隊：「據我所知亞姐嘅宣傳片而家係七月打後先拍嘅，我到時應該講得切過去。」
