【now.com】今日係年三十晚,先祝大家雞年行大運,身體健康!
以往過年,大家真係會趁年尾時候辦定年貨,不過啲年貨唔係海味曲奇餅,而係大量電影或演唱會VCD、DVD。往時影碟舖一到年尾,大大張螢光紙牌,寫住100蚊5隻VCD,99蚊3隻DVD,擺到成行成市,不少人見平平地,都會買定幾隻擺喺屋企「責」年,用嚟自娛解悶好,親朋戚友嚟到睇吓笑吓又好,再唔係開番套戲陪住大家打麻雀都得!總之就係要熱熱鬧鬧先至似過新年。而其中,周星馳好肯定係大家最愛之選。
雖則大家對周星馳作品的純熟度,係去到背唔出對白就唔好話自己係星迷,之但係熟還熟,有啲戲就係越睇越過癮,再背得出你都係想聽星爺講一次,經典咪就係咁解。再推介邊套邊套都係多餘,不如就趁過年,同大家玩個遊戲,之前有網友在網上試玩「唔准Google卡通人物繪畫大賽」,?�家就有樣學樣,整個「唔准Google 10條星爺駕歲片問答大賽」,又睇下你攞唔攞到個全中!
01 《整蠱專家》、《破壞之王》、《唐伯虎點秋香》、《西遊記第壹佰零壹回之月光寶盒》,以上邊套當年並非在賀歲檔上映?
02 《家有囍事》中,常歡受到腦震盪後,患上的症狀叫咩名?一口氣講,唔准停頓。
03 《整蠱專家》古晶有一段極長的自我介紹,請完整地講一次,畀個提示︰第一句係︰改進社會風氣……
04 《大內密探零零發》的保龍一族,除了零零發,其餘三人分別練成邊三樣絕世武功?
05 《行運一條龍》的八兩金,係皇極驚天拳第十代掌門人,佢叫咩名?
06 《喜劇之王》的龍少去到夜總會搵初戀,最終柳飄飄成功扮成佢嘅初戀情人,咁佢位初戀情人叫咩名呢?
07 《97家有囍事》,周星馳飾演的老恭,要求大嫂整咩早餐畀佢食?
08 《西遊記大結局之仙履奇緣》中,至尊寶暈咗期間,叫咗娘子個名白晶晶98次,但同時又叫咗紫霞幾多次?
09 《破壊之王》入面,有綽號「魔鬼筋肉人」之稱的吳孟達,為失戀的周星馳提一個咩套餐,聲稱可挽回自信。
10 《逃學威龍3之龍過雞年》結局一段,周星星因為識得用身體邊度開槍而成功殺死兇手?
答案︰
01 《唐伯虎點秋香》,1993年7月1日上映
02 無定向喪心病狂間歇性全身機能失調症
03 改進社會風氣、瘋魔萬千少女、提高年青人嘅內涵、刺激電影市道、玉樹臨風嘅整蠱專家
04 零零恭練鐵布衫、零零喜練碎石腳、零零財練五形拳
05 吳留手
06 Mary
07 打邊爐
08 784次
09 抵抗失戀沖喜套餐
10 用腳趾
文:余建
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場