【now.com】雖然聖誕節都未到，但一眾猴年賀歲片已經蠢蠢欲動開始宣傳。卡士上沒有最強，只有更強，因為今年是鮮有的周潤發大戰周星馳力撼四大天王。先有周潤發＋劉德華＋張學友＋張家輝的《賭城風雲III》，繼有郭富城＋鞏俐的《西遊記之三打白骨精》，然後靜靜地起革命的有黎明的《Z計劃》，最後就有周星馳執導的《美人魚》。
頭兩部已經有前科，而且正式海報亦出埋，大約會知係咩一回事。另外兩部就一直收收埋埋，小小頭緒都冇。直至昨日，由星爺執導的《美人魚》突然先發制人，一個轉身擺尾，率先發放第一條預告片。內容講述一名市民去報案，話剛才被頭髮長長，身材婀娜的美人魚綁架，然後警員單憑半人半魚這個形容，將不同組合的可能性畫出來，令報案者感到氣結，但鏡頭一轉，就影住一條由肥大叔扮成的美人魚展現人前。
醜男扮靚女、一眾奇形怪狀極盡騎呢的臨記，還有經典的《如來神掌》主題配樂，一切一切都係周星馳電影的特色，理應看罷會好興奮。實情是，儘管已經連續看了三、四遍，手機電腦放大縮細都看一次，結果還是一片失望而回。雖則套戲都未睇就批評是欠公道，但回想對上一次看《西遊‧降魔篇》預告，一個大聖爺背脊做開場，連隨一堆豬八戎、沙僧的特技場面，還有一句「一萬年太久 只爭朝夕」，就是叫人期待。
可能《西遊記》跟周星馳的關係千絲萬縷印象分特別多，可能有個舒淇望吓總好過得一堆麻甩佬充斥，更可能條片係中國版，未配廣東話啫，配番感覺會好好多。或許以上全是理由，不過當你反覆睇多幾次預告片後，你自會明白點解搵極都搵唔番周星馳陣味，因為隱隱約約間，一股酷似馮小剛的氣味正滲出來。這個評價，對一心拍國產片，一心再向14億人市場挑戰的星爺來說，會是一種高度讚美，因為將他媲美為內地最高身價的喜劇導演。不過對香港觀眾而言，似乎又多一樣香港土產宣佈絕跡了，並要放入回憶專區好好懷緬。電影未看，希望這只是自己估錯過慮無稽多疑甚至多餘，因為我實在受不了在同一星期，失去了Beyond時，又再失去周星馳這兩大精神支柱啊！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
