【now.com】你要在甚麼情況下先肯飲自己的尿?被困在瓦礫中,缺水缺糧3日3夜?想效法陳啟泰飲尿防脫髮和防癌?還是如謝天華,為賺人仔養家,不惜在鏡頭下大啖大啖喝下去!
近年積極在內地搵食的謝天華,早前便參加由著名探險真人騷《人在野》(Man Vs Wild)的中國版《跟着貝爾去冒險》,由主持人貝爾(Bear Grylls)帶領一眾藝人在野外求生。有看過《人在野》的話,都會驚歎Bear的求生技倆,尤其是搵食物充飢的畫面,蚯蚓、蟲、青蛙、蜘蛛、動物內臟等,有機會煮熟的便熟食,冇機會便生吃,簡直睇到頭都痕。
來到中國版,節目內容貫徹挑戰眾人接受能力,生食蚯蚓、牛內臟都早已納入任務之一,如果失敗就要接受屎水洗禮,期間謝天華就曾經受過這「禮待」。不過,最精彩的還是大結局,一早就叫定大家漏夜儲定篤尿,然後翌日接受終極挑戰︰飲尿!雖然劇組強調那樽精華會經過高溫蒸餾消毒及加水稀釋,不過講到尾咪又係尿,要飲都要一定勇氣。最後節目中所有參賽者無論男男女女都大大啖飲個乾淨,實在戥幾位辛苦。節目一出街,大家議論紛紛,質疑搵食啫,使唔使出賣尊嚴到咁?完全體會幾位嘉賓為咗人仔,可以去到幾盡!
近年內地觀眾愈來愈鍾意睇真人騷和綜藝節目,只要睇住一眾藝人真情流露或受苦受難,節目就會大受歡迎,就會賣到錢。幕前的激鬥固然精采絕倫,但幕後的身價比拼又是另一精采。由於每個節目都出得起一個令人難以抗拒的薪酬,所以能動員的明星愈來愈巨星級,所做的演出亦愈來愈強人所難。而當中亦暗藏了一條「人仔食物鏈」,想知自己將會被安排做甚麼,麻煩埋去個表度拼一拼,睇下自己屬於邊一層。當然,高層次如天王天后周杰倫、林憶蓮的,就可以上《中國好聲音》和《中國之星》,坐得舒舒服服擔任導師和評判便可以。次一級如李克勤、容祖兒,係咁意啦,戴個面具上《蒙面歌王》唱首歌俾大家猜猜我是誰。對內地觀眾未算好認識的楊千嬅、丁子高,要勞動少少喇,去《極速前進》玩鬥牛同攀石啦。所以來到謝天華這級數的,在這人仔食物鏈差不多是底層了,已經冇乜好嘢俾你揀,屎尿屁總要有吧!
內地新聞經常出現一些食品造假事件,但願這次一飲而盡的「熱啤」,都是網民所講,係用菊花茶扮啦!
文:余建
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。