【now.com】香港機場三跑自提出以來,都已經議論紛紛,由造價、環評到空域問題,一一未解決,機管局就突然提出自行融資方案,繞過立法會來一招霸王硬上馬。此舉又再引起大家嘩然,令工程添多一分負面形象,所以有關當局就大搞化妝工程,今次請來樂壇校長譚詠麟拍廣告,高呼「我哋要繼續高飛!」去呼籲大家支持工程。本來,形象工程就解決不到環保和空域問題,最終三跑的價值亦成疑,不過搵到校長拍廣告,就突然好有一錘定音效果,為大家增添信心,堅信呢項工程又係沉迷賭博,倒錢落海。
咁講係因為向來有「樂壇比利」之稱的譚校長,並非讚揚其腳法凌厲,草地上任佢馳騁,兩者惺惺相惜的地方是在於眼光!比利向來是世界盃明燈,每年被他睇好奪冠的球隊,最終不但空手而回,往往仲8強、16強止步,例不虛發。至於我們的譚校長,他的點燈神功也練得爐火純青,每次被他睇高一線的樂壇新人,一冠上甚麼接班人、樂壇新希望、明日之星等綽號,就立即見光死,總之叫得愈大,跌得愈急愈快。
就以近十年兩單舉足輕重,照到燈火通明的戰績報告分析俾大家聽。2006年以校長契仔身份闖樂壇的關楚耀,數年間獲契爺仆心仆命支持,無論大小音樂會,自己開的契仔開的,都會互相出席撐場,隨後仲欽點埋佢做接班人。可惜契仔在09年日本藏大麻事件,令本已不明的前途更趨暗淡,復工後亦無以為繼。
雖然呢單食到應一應,但亦無損校長的Watt數,繼續堅守普照世人的位置。2008年便睇中五人樂隊MR.,今次校長更瞓身,由賞識、引薦到扶持一手包辦,如此疼愛他們因為校長覺得五位甚有當年溫拿的影子。這股愛更令兩個單位在10年合作推出《Rolling Power》專輯,揚言要身體力行帶住呢隊少年溫拿攻陷內地市場。然後最奇怪的事情發生,明明09年Mr.仲有首《如果我是陳奕迅》唱到街知巷聞,但一年間就好似撞邪咁,頭頭碰著黑,作首歌講句嘢唞啖氣都被網民抨擊,後來到台灣發展亦不如意,到今年更決定跟環球解約,暫停工作。所以肯肯定,校長絕非是一盞省油的燈!
或者你會話︰「克勤呢?夠照啦!」我哋又睇睇,87年推出首張專輯的克勤,89年一首《一生不變》贏得不少金曲獎,在這刻校長發功,於訪問中為克勤加持,標明佢係自己的接班人,又咁啱四大天王出現,克勤未被納入,從此就展開其浮浮沉沉的星途,要去到2001年因為跟港樂合作的音樂會,才得到翻身機會。在03年的《左麟右李演唱會》上,校長也承認當年一句說話,害了克勤走好多冤枉路。
所以校長一句話已可以定生死,而根據往績,佢愈係發力就愈大鑊型,Watt數跟「鑊數」成正比。今次唔止出口撐,仲幫你拍埋廣告!所以肯定,香港人就快可以同泰國人講,我比你哋更鍾情大白象啊!
文:余建
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場