【now.com】重溫完《大時代》,昨日深夜輪到令大家到笑個不停的《他來自江湖》接更。劇集於1989年尾播出,時間上就似為周星馳輝煌的90年代揭開序幕。雖然早在《蓋世豪俠》,星爺已鋒芒盡顯,不過何鑫淼(發音︰音渺)的深入民心不是古裝劇豪俠可媲美。單是角色名捨難取易地有邊讀邊,索性叫金水,就已經是最反映出本土的「地方智慧」。
作為的士司機,金水從來冇鍾意過份工,日日過著歐洲式生活,夠鐘搵夠就收工。這種工作態度,至今我們仍然承傳下來,只是行業改為在街Sell寬頻、在商場推廣信用卡,或者每日親切地致電你,關心你財政狀況的借貸推銷員。難道你夠膽講自己嗜好就是在街企足8個鐘,或致電陳生張生獲取一聲「問候」?有邊個唔想搵多啲,金水想,你都想,但又理性地覺得自己能力有限,於是試圖用其他方法去達至唔使做的境界。金水會借老表明天(萬梓良飾)的身分,介紹佢到文氏企業打工,目標就係黐下有錢佬金糠,搏一日被睇中唔使撈。現實中,有錢佬大家識唔到,但搵錢機會也從不缺,炒iPhone、炒紀念鈔、炒演唱會飛、炒麥當勞玩具,甚至炒形形式式的籌,五花八門,廿年來目標依然清晰一致,都是想賺快錢。不過我們更羨慕金水有部私人ETC(羅蘭),長撳長有。
金水在這30集來,人生大上大落,有時順風順水,亦有時落泊潦倒,最風光可以九唔搭八地做起投資顧問,建議老細買邊隻股就升邊隻,時來運到。不過幾個月後又會打回原形,三個六返大陸咁還原基本步地揸的士。回顧香港人這廿年光景,生活又何曾平淡過。炒樓賺過大錢,點知金融風暴、禽流感、沙士,令大家認識負資產、銀主盤、燒炭這些可怕名詞。然後痛定思痛,咬牙切齒就要搞實業,講創新,求科技,不再炒炒賣賣。結果風浪一過,又重操故業繼續低買高賣,而且由磚頭變成奶粉、手機等物品,繼續享受在風浪中度日。
30集過後,何鑫淼認命,娶了甩頭芝(梅小惠飾),踏踏實實地揸番的士養妻活兒。至於我們,25年過去,未認輸,大家仍然醉心去演昔日的何鑫淼,這仍然是我們最喜愛的角色。
文:余建
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。