【now.com】《聶隱娘》揚威康城，可喜可賀。亦證明了侯孝賢使用固定演員，有其效果。侯導從2001年《千禧曼波》開始起用舒淇做女主角，他產量不多，之後主理的華語片《最好的時光》和這部《聶隱娘》，都是用舒淇，還加上了張震，似乎這三人今後將繼續合作。在侯導的藝術鏡頭下，舒淇是個奇異的存在，事實上她除了《不再讓你孤單》比較演得好外，其餘大都是商業片居多，侯孝賢拍的舒淇彷彿是另一個演員，大概從他眼中看到別人看不到的一面吧。
不少大導演都愛用固定演員，小導演當然還未夠資格用固定啦，公司俾邊個就要拍邊個。每個組合的形成都有不同原因，並非單純黃金組合咁簡單。香港為例，王家衛以《阿飛正傳》將梁朝偉一手捧紅，正確地說梁朝偉本來已很高名氣，但《重慶森林》令他初嘗影帝滋味，然後《春光乍洩》、《花樣年華》再連續得獎，若你是梁朝偉，如何離得開王家衛？爾冬陞跟吳彥祖情況有點相似，當然未到影帝咁誇張，但《旺角黑夜》前後的吳彥祖是有分別的，之前他是個靚仔演員，有潛質；之後他是個靚仔而有爆發力的演員，爾冬陞提升了吳彥祖的層次，並一直起用。杜琪峯亦有固定演員，不是劉德華鄭秀文，不是古天樂劉青雲，你估下邊個？是林雪！將林雪拍到獨當一面，杜Sir可謂神乎其技。
大陸也有這類導演和演員的固定組合，另一影展常客，導演賈樟柯幾乎固定用趙濤做女主角，趙濤多年來因此攞獎攞到手軟，2011年嫁埋俾賈樟柯。還有馮小剛和葛優這對賀歲孖寶呢，1997年首次銀幕合作《甲方乙方》大受好評，可說是打開國產賀歲笑片市場，之後10幾年間合作了10部電影，葛優在馮小剛的電影裡，地位比馮太徐帆更高。
也有些導演跟演員關係撲朔迷離，例如蔡明亮和李康生就一直被懷疑是同性戀人關係，直到2014年蔡明亮出櫃，順便否認了這傳言。馬田史高西斯和李安納度狄卡比奧也是一直拍一直拍，拍到天荒地老，大家都已相信史高西斯好想幫狄卡比奧攞奧斯卡男主角獎，但每次都差個馬鼻，好似追生仔咁，收唔到爐。
這些組合帶來大量高質電影，但針冇兩頭利，同時加劇了青黃不接的問題，至少其他華語演員想衝出國際，要排隊先啦。
文：魯連
〈娛樂乜乜乜〉
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。逢星期一至五刊登。
