【Now.com】NBA打緊季後賽，大家喺電視螢幕上睇到精彩畫面，背後其實有賴事前部署大量鏡頭捕捉球員每個動作，導演實時將每一秒細節呈現畀全球觀眾。科技YouTuber MKBHD 走到NBA 球場上，實地了解每一個畫面係點樣拍到。
MKBHD話，每個NBA球場都部署咗40至50部專用攝影機，而主畫面所用嘅係價值五萬美元嘅Sony P50機身，行1080p 60fps高速拍攝，呢部機最正地方係Global Shutter (全域快門)，所以拍攝運動畫面要左右pan，都唔會有Rolling Shutter機種常見嘅扭曲變形畫面。
這批攝影機插咗高達122倍光學變焦嘅Canon廣播級鏡頭，攝影師能夠用伺服摩打精準追蹤籃球軌跡並流暢對焦。至於大家經常見到由球場一邊高速移到另一邊嘅畫面，就係用DJI Ronin 2穩定器「飛天鋼索（Cable cam）」攝影機懸掛半空，部機滑動時仲可以pan住對準球場中心位置，即係大家見到標誌性開場廣角畫面。
籃架都有幾部cam
為咗捕捉籃底禁區內球員激烈對抗，籃架上下都安裝大量拍攝與收音設備。籃板後方及計時器上面配備俯瞰視角嘅Sony拍片機，以及Nikon D4單鏡反光相機負責影相，利用黑膠布遮擋籃板玻璃反光，完美記錄球員上籃入樽嘅震撼瞬間。場館四周亦收埋咗幾十支指向性收音咪，專門收錄球鞋喺木地板上嘅摩擦聲、籃球刷網聲及球員對話聲音，大大提高現場直播賽事嘅臨場感。
大家可能會諗控制咁多部攝影機、處理精彩畫面即時轉播，背後嘅導演究竟喺邊度，原來佢並唔喺球場內。以今次球賽為例，場外有六部大型轉播車，車裡面ENG負責將大量影像進行實時調色，同時做好混音。重播操作員會使用EVS控制器，將180 fps高格數畫面轉換成慢動作畫面，喺入球後幾秒內就可以為觀眾送上慢動作重播。荷里活電影有劇本有時間，往往用幾個月時間做前期拍攝、後期製作，但運動廣播都係無劇本下，靠導演即時指揮，靠攝影師經驗鎖定特定球星，拍攝精彩入球，一切都要即時，實時播出。
NBA近年亦引入生成式AI（Generative AI）技術，提升賽事公平性同轉播觀賞度。NBA與AWS合作開發專門識別妨礙中籃（Goaltending）嘅AI模型，系統能夠喺50毫秒內極速運算籃球軌跡與籃框關係。當發生爭議判決時，系統會自動生成模擬畫面畀轉播單位播放，以精準科技輔助球證肉眼判斷。
自由視角立體重播
NBA同時採用自由視角（Volumetric）影片技術，為觀眾帶嚟好似打機嘅360度立體觀賽體驗。部分重要賽事，場館四周會配置高達110部攝影機，緊密追蹤場上每位球員動態。有關數據會與球員3D模型實時結合，觀眾睇重播時就會睇到好似電影21世紀殺人網絡，瞬間角度轉移睇入波！
