球迷昨日相聚觀看美斯告別戰。
(筆者提供)
【Now Sports】真係有好多嘢想同美斯講。由我哋細個睇你喺巴塞隆拿踢波，到後來你著起阿根廷件藍白戰衣，你陪住我哋長大，我哋亦都陪住你經歷高低。
撰文：Zen（AFFC 香港阿根廷足球球迷會會長）
2014年決賽輸咗，我哋同你一樣咁痛；2021年美洲盃、2022年世界盃，你終於圓夢，我哋真係喊到收唔到聲。
呢日嚟到告別戰，老實講，好唔捨得，心情好複雜。但更加想同你講一句：多謝你。你唔止係球王，你係我哋嘅青春，令我哋相信努力同堅持，秉持我哋阿根廷足球嘅信念。你已經將最好嘅一切，都畀咗足球，你唔需要再證明任何嘢。
呢日我哋唔係嚟同你講再見，係嚟同你講一聲：美斯，多謝你！無論你將來去邊，我哋都會繼續撐你。你永遠都係我哋心目中嘅10號，嚟緊嘅日子，請好好享受生活。
