英格蘭與民主剛果世界排名差37位。
(©AFP)
【Now Sports】世界盃分組賽完結，淘汰賽隨即展開，今屆決賽周由於增加至48隊，所以今屆首輪淘汰賽係32強，各支出線隊伍若想攞世界盃冠軍就要比以往多打一輪淘汰賽！今日同大家講下英格蘭對剛果民主共和國呢場比賽。
撰文：陳肇麒｜Now足球評述員
英格蘭分組賽取得2勝1和首名出線，分別擊敗克羅地亞及巴拿馬，賽和加納。看似順利的出線資格，其實暗藏問題！對巴拿馬的上半場及對加納的全場比賽一直久攻不下，攻門機會非常之多但總未能將皮球擺入網。中前場星光熠熠名單，相信主帥杜曹淘汰賽要好好諗下邊個配搭人選，先至可以發揮最大功效。相反嚟講，呢個亦係英格蘭教練一個幸福的煩惱！
剛果民主共和國，以其中一個最佳小組第3出線。分組賽3場賽事，1:1打和葡萄牙，0:1輸畀哥倫比亞，3:1反勝烏茲別克。剛果民主共和國呢支球隊，感覺上球員體力化、齊上齊落，防守時雖然夠人數回防，但對手都容易搵到位置攻門，就以對哥倫比亞比賽為例，哥倫比亞全場一共20次攻門9度中目標。進攻方面，效力紐卡素嘅20號前鋒韋沙，3場分組賽入咗3球，球隊現時首席射手，狀態火熱！
英格蘭世界排名第4位，剛果民主共和國排41位，論世界排名差37位之多，相信呢場比賽英格蘭可以搵到唔少埋門機會，即管睇下呢場係哈利簡尼、華舒福、薩卡，定係比寧咸可以將個波放入網啦！
世界盃32強 英格蘭VS剛果民主共和國
Now TV 618台2/7 00:00直播
Now TV 616台4K直播
