大衛上仗大放異采，為加拿大攻入3球。
(©AFP)
【Now Sports】嚟到第3輪分組賽比賽日，今日同大家分析下B組形勢。B組分別有主辦國之一加拿大、瑞士、波斯尼亞及卡塔爾，該組最後一輪比賽，由瑞士對加拿大，波斯尼亞將面對卡塔爾。
撰文：陳肇麒｜Now足球評述員
經過頭兩輪嘅比賽，加拿大及瑞士同樣1勝1和得4分，分別排第1、2位，至於波斯尼亞與卡塔爾就1和1負，累積1分排3、4位。
瑞士對加拿大呢場比賽，加拿大正選球員8號伊斯馬干尼被對手踢斷腳，今屆世界盃無法再上陣，對加拿大嚟講絕對有影響。睇積分榜上，兩隊可以踢得好簡單，如果呢場比賽最終係打和，兩隊將一同出線。
反觀波斯尼亞鬥卡塔爾，雙方第2輪分組賽都有球員領紅被逐離場，波斯尼亞有1人、卡塔爾更有2名球員被趕離場，今場都不能上陣。雙方陣容不整下，相信波斯尼亞實力上高於亞洲球隊卡塔爾，兩隊只能活一隊，既要全取3分又要寄望瑞士對加拿大呢場比賽可以分出勝負。
B組出線形勢相信加拿大及瑞士好大機會攜手晉級，波斯尼亞及卡塔爾就算最後1輪贏波全取3分，但係賽制同分計得失球差之下，兩軍經過兩輪後目前得失球差分別係-3及-6，相信能直接晉級機會都幾渺茫，唯有全力爭勝務求以其中1個最佳分組第3名晉級32強。
世界盃B組第3輪 25/6 03:00開賽
瑞士VS加拿大 Now TV 618/616(4K)直播
波斯尼亞VS卡塔爾 Now TV 619/617(4K)直播
