【Now Sports】每個人一生中都遇到一個改變自己嘅偶像，我嗰個就係摩迪。
撰文：Karen
開始喜歡摩迪（Luka Modric），係分兩個時間點，第一個點係由2018世界盃，對英格蘭反勝嗰場。有一個畫面，當時唔知有冇記錯落後緊定就快完場，佢由左路加速爆去右路邊線，為咗踢番個波畀隊友，即使對手同樣就嚟掂到波，或者時間已經唔多，佢仍然想贏。嗰一刻，我深深記住咗。勤力跑動，從未放棄，堅韌踏實，呢個人叫摩迪。當時只係世界盃球迷嘅我，並未有繼續留意佢，諗住佢應該都退役了。
然後到2022世界盃。又見到你？！
心諗：呢次冇咗文素基治同拉傑迪，你又老咗4年，格仔應該冇機會啦啩……
然而畫面返到4年前。一次又一次奮戰加時到最後，一場比一場動容，喺佢身上，年齡只係數字。克羅地亞憑12碼踢巴西出局，記得嗰晚好凍，但我激動到出晒汗。我忍唔住熱淚盈眶，內心同克羅地亞連接埋一齊咁，最終格仔軍以季軍完成世界盃之旅，由呢這屆賽事，我正式成為摩迪與克羅地亞球迷。
可能同個人經歷都有關連吧。即使條件不是最好，遲起步，一切都被看不起，不過就憑意志和努力成就夢想吧。一切皆有可能，只要心懷熱誠，只要不放棄，世界總能看見你嘅決心，生命係經驗嘅累積，時間把一切沖淡，亦能把一切昇華。
從此開始追看他每一場球會和國家隊比賽。唔知道幾時會係最後一場，一路睇一路珍惜，每睇多一場，都彷似多發現一點呢個「神」嘅美好。球場上施展魔法，球場下低調樸實，真誠活著。
於我而言，摩迪係一種精神信仰。
從崇拜佢呢件事，恍惚都令我變得更好。認真努力，低調謙卑，強大堅毅亦對世界溫柔善良。人生好長，面對不少困境，但每當想起呢種信仰，就覺得獲得力氣去面對一切了。就如摩迪所講：The best things never come easy.
自從成為佢嘅粉絲，就好想親身見到佢。
第一次係2024年3月去皇家馬德里訓練場，等咗幾日係唔成功嘅。記得喺皇馬訓練場外，都見到唔少幾歲嘅小朋友，佢哋會認得晒每個球員，亦有一身好球技，未等到偶像時舞住個波解悶。我唔識踢波，但會覺得呢種熟練嘅程度，唔似香港興趣班常見；睇波時嘅投入同大人一樣，足球好似一早融入咗佢哋嘅生命入面。當然，呢點牽涉好多因素，後話了。
同年歐洲國家盃去德國，比賽前同班克羅地亞球迷一齊打氣，過萬人合唱克羅地亞首本打氣名曲“moja domovina”，佢哋又教我講克羅地亞文，好有趣！見到現場咁多人同你有住同一個盼望，超級熱血、充滿激情，好感動。歐洲足球文化真係好深厚！
2025年5月第二次去西班牙，終於圓夢。喺網上見過有其他球迷話寫「大字報」會容易啲引起球員注意，就諗住試吓，講自己遠道而嚟blablabla～～（喺訓練場外面同當地球迷交流吓得到好多資訊，幾點開始訓練、幾點放工之類，連車牌都認埋。）
吸收上年經驗，加埋上天保佑，第二日就成功等到摩迪停車簽名同影相，我當下完全呆晒，淨係識笑同喺攞返件波衫之後，不停講「Thank you, Luka!」，咁近距離見到心中嘅「神」，一世都記得。
當時一直有傳佢唔會再留喺皇家馬德里，唔知係咪因為咁，所以佢停低同粉絲簽名。
我覺得，趁佢未退役之前去訓練場等佢，係最容易見多佢一次嘅方法。
於是啱啱嘅5月去咗米蘭。
AC米蘭訓練場比皇馬更偏僻，已有心理準備（三個字車程先有最近嘅餐廳/車站/公廁，要行開真係唔知點算），亦要預備等幾日亦未必成功。好記得第一日去食白果：當日無訓練。（非AC迷，做唔夠資料搜查）
然後第二日再去。準備充足養精蓄銳，喺門口拎住「大字報」望實每架駛入訓練場嘅車，睇吓摩迪幾時返。等咗一段時間，保安叔叔知我係等摩迪。無耐有架七人車駛入去停低，然後個叔叔指住呢架車同我講：「Luka喺度呀，依家落車啦。」（佢用意大利文表達，之後我哋嘅交流，都係Google translate)
即刻離遠一望，真係佢！心諗咗句：點解唔係揸車嘅？即刻大叫佢個名，佢擰過嚟望到我，之後就行咗入去了。
過咗幾個字左右，好多球員都陸續到咗，呢個時候保安叔叔行埋嚟表示：「你哋唔使等了，啲球員今晚會喺訓練場過夜，聽日一齊坐隊巴走，所以你哋可能唔會見到任何球員啦。」
由於過兩日就係賽季最後一場比賽，換言之，訓練場都唔會再有訓練。
雖然已有心理準備未必會成功，但聽完都有啲失望。不過既然咁遠嚟到，就不如企多陣，當時仲有另外兩名球迷都係想搵摩迪，就同佢哋傾一陣偈，然後最奇妙嘅事發生了：有職員行出嚟問：係咪有人想搵Luka啊？你哋係咪攞住佢嘅波衫？
What？？？Yes！！！
我哋都呆咗，開心到呆咗。
摩迪特登出番嚟大門口，同我哋簽名影相呀！職員帶我哋行去大門口度，見到「神」了，眼中只有激動淚水。
今次嘗試保持冷靜，講咗幾句欣賞佢嘅說話，多謝佢幫我哋簽名，祝佢塊面早日康復blablabla。（本來有想過送禮物畀佢，但諗諗吓佢咩都有，送畀佢嘅又未必啱佢用，食物就更唔在講，球員身體唔係可以亂食嘢喔）隻言片語表達不來，我遞上一封親手寫嘅克羅地亞文信，信入面表達咗我對佢嘅敬重，同點樣影響我對生命嘅睇法，好老套，開心。
（呢次旅程嘅成功，要畀番掌聲嗰個保安叔叔，唔係佢同我講摩迪入咗去，我就唔會同到摩迪打招呼，然後佢就唔會出返嚟搵我哋簽名）
就係咁，一年一會，畢生難忘。
克羅地亞前屆世界盃得到亞軍，上屆季軍，今屆要keep到咁好成績，知道係唔容易，不過搏盡無悔，有唔少球員都係5大聯賽球會主力，即管睇吓佢哋點樣好好發揮。除咗克羅地亞，邊隊最有冠軍相？哈哈，格仔死忠，唔想估邊隊贏，出咗局就食花生心態睇其他球隊。
另外，都會留意吓日本，亦想同一樣支持格仔嘅球迷睇波。
【一生一世盃】，睇波美好回憶，可以係一生一世。決賽周前訪問不同界別球迷，分享睇世盃的難忘回憶，以及對今屆賽事的睇法。
相關文章：
【一生一世盃】與洛杉磯有約
https://sports.now.com/home/wc2026/news/details?id=39644866501
【一生一世盃】巴西現場採訪見證冇飛球迷衝入場
https://sports.now.com/home/wc2026/news/details?id=39638929183
【一生一世盃】獲C朗贈獎牌女球迷：出發到美國！
https://sports.now.com/home/wc2026/news/details?id=39637131351
【一生一世盃】女球迷為迪恩尼捧蘇格蘭
https://sports.now.com/home/wc2026/news/details?id=39629112813
【一生一世盃】施寶盛：狂牛傳接仍屬世界級
https://sports.now.com/home/wc2026/news/details?id=39623502031
【一生一世盃】狂迷上屆現場追睇法國
https://sports.now.com/home/news/details?id=39621563987
【一生一世盃】余德丞撐簡尼
https://sports.now.com/home/wc2026/news/details?id=39621021858
【一生一世盃】嫁著馬騮隨山走
https://sports.now.com/home/wc2026/details?id=39616300974
【一生一世盃】劉舜文：最想同路維睇波
https://sports.now.com/home/wc2026/details?id=39613823882
【一生一世盃】居港西班牙人：決賽周兩邊飛
https://sports.now.com/home/news/details?id=39606745542
【一生一世盃】馬評人CP難忘與故友
https://sports.now.com/home/news/details?id=39601023934
【一生一世盃】植詠珊：最想約螢花隊友睇波
https://sports.now.com/home/news/details?id=39597496200
