般奴平20次助攻紀錄 曼聯3：2森林

【Now Sports】曼聯在般奴費蘭迪斯交出本季第20次助攻下，主場以3:2擊敗諾定咸森林。

周日曼聯主場對諾定咸森林的英超比賽，亦是季後離隊的卡斯米路，最後一次在奧脫福亮相，此子今戰正選為紅魔上陣。開波5分鐘，曼聯即取得好開始，皮球在森林禁區遲遲未解圍下，後上的梳爾左路禁區一控抽射，皮球直飛遠柱貼柱入，攻入他本季第1個入球，曼聯領先1:0。

曼聯領先後放慢節奏，森林方面直至20分鐘才有首個埋門，復出的傑斯韋治半單刀下被拿文斯撲出，隨後曼聯立即打反擊，安保姆帶波扭過沙斯後埋門，但射中門柱，其後卡斯米路後上抽射，又貼柱出界。30分鐘，般奴費蘭迪斯禁區頂遠射，但不中目標；那邊廂森林32分鐘有尼高拉斯杜明基斯接應艾利亞治安達臣頭槌埋門高出。森林尾段有幾下角球攻勢，威脅曼聯後防但未見成效，半場曼聯領先1:0返回更衣室。

下半場首個埋門出現在曼聯身上，46分鐘安保姆小禁區接應阿麥迪亞路右路出波抽射，但一飛沖天。其後森林入波出現，艾利亞治安達臣右路出波，摩拉圖近門一頂破網，53分鐘追成1:1平手。55分鐘，曼聯一度有安保姆疑似手球下埋門，省中森林守衛，古亞禁區接應拉弓遠柱入，經VAR檢視證實入球有效，曼聯再度領先2:1。62分鐘傑斯韋治再一次右路半單刀機會，但被拿文斯封位成功；曼聯亦有安保姆及阿麥迪亞路的埋門，但無功而還。

森林其後換入阿旺尼、巴古亞及桑加希加強攻力，但入波先出現在曼聯身上，77分鐘般奴右路出波，安保姆小禁區篤射破網，曼聯領先3:1，般奴亦以20個助攻追平亨利和奇雲迪布尼的紀錄。之不過1分鐘後，安達臣右路傳中，傑斯韋治第一時間快射遠柱入，78分鐘追成2:3較接近紀錄。森林臨完場階段積極反撲，但未能撕破曼聯的防線，紅魔亦有連番起腳但未能把握，最終曼聯主場3:2擊敗森林。