【西甲】利雲特3：2奧沙辛拿

【Now Sports】利雲特西甲主場落後2球下，以3:2反勝最終10人應戰的奧沙辛拿。

利雲特賽前排尾二護級形勢水深火熱，開賽3分鐘更先送大禮，守將台恩「擺烏龍」剷入己方龍門，奧沙辛拿得以先開紀錄。客軍戰至11分鐘，由球隊首席射手布迪美亞尾柱趕到建功，攻入個人今季聯賽第16球，亦領軍擴大優勢至2:0。

不過利雲特及後藉域陀加西亞3分鐘內連下兩城扳平，後發先至快腳射入，繼而超遠途程似傳非射，直接彎入龍門。奧沙辛拿門將沙治奧靴里拉上半場完結前，棄關出迎鹵莽出手阻截對手單刀，球證直接紅牌趕他出場，奧軍下半場被迫10人應戰。

換邊後變成攻防戰，利雲特的迪拉放支冷箭中楣底不入。直到90分鐘，喀麥隆前鋒艾安近門一頭定3分，這名後備奇兵打破半年入球荒，兼助利雲特險勝3:2，兼送奧沙辛拿2連敗。