維拉力圖平反敗局。
(©AFP)
【Now Sports】作為一個阿士東維拉球迷，我們見證過太多次希望與失望。每一次我們都會以為「今次維拉有機會啦」，但很可惜每一次結局都會令人心碎。
兩年前，我們打入歐協聯4強，滿心期望可以打破錦標荒，可惜事與願違。上屆足總盃4強遇上格食格的水晶宮，最終大敗出局，再一次失望而回。今屆歐霸盃順風順水，連贏9場殺入4強，可惜偏偏遇上來自英超的諾定咸森林，對維拉來說，面對英超隊有時比對其他歐洲球隊更難應付。加上對手季尾狀態大勇，以及首回合我們更無厘頭輸12碼導致落後。那種無奈，就似足兩年前主場對奧林比亞高斯一樣，因為一球莫名其妙的手球被拉開比數，最終無緣決賽。
其實維拉球迷心裡，經常會為球隊總在關鍵時刻失諸交臂而感到無奈。但正因如此我們更加不想放棄。今晚將會是球隊可以改變歷史的一夜。我們有機會見證維拉打破宿命，衝過那道一直過不去的高牆。維拉球迷必須保持信念，要更落力打氣及支持。球場上的11人需要我們第12人的力量。
我相信維拉公園是我們的福地，我們曾經在維拉公園打擊過多支歐洲勁旅，包括巴黎聖日耳門及拜仁慕尼黑。所以，今晚絕對可以擊敗森林晉級決賽。名宿哥利摩亞講過：“The lows just make the highs higher.”， 從低谷再站起身，才會令人更興奮。希望今晚可以由低谷彈起，一齊興奮！
I believe.
We believe.
Villa believes.
Up the Villa
Kidd So
香港維拉官方球迷會
歐霸 阿士東維拉 對 諾定咸森林
Now TV 643台 08/05 03:00直播
