比圖2+1 車仔吞愛華頓3蛋

【Now Sports】周六英超，愛華頓有賴比圖上、下半場各入一球，令車路士遭逢各項賽事的4連敗。

愛華頓去仗敗走阿仙奴後，今仗有中路守將達哥夫斯基復出，令剛獲英格蘭代表隊領隊杜曹召用的加拿回歸中場位置。車仔被巴黎聖日耳門大敗後變陣，古斯度病癒復出，而韋斯利科芬拿取代傷兵查禾查路巴的正選位置。

車路士今仗控球時間與埋門次數其實都多於主隊，但拖肥把握更佳。上半場33分鐘，比圖（Beto）接應加拿一記靚直線入楔，趁羅拔山齊士出迎射遠柱入網。車仔努力反撲不果，安素費蘭迪斯完半場窩利被佐敦碧福特救出。

車仔到62分鐘再失守，當時基耶在後場截得皮球後奮進，傳交予比圖，比圖在禁區內射門乏角度，羅拔山齊士明明擋到卻讓皮球從雙腿之間入網。比圖今仗不僅入波，亦貢獻助攻，他於76分鐘頭球傳交予基耶，後者推入禁區抽射掛網，為拖肥湊成3:0大捷。車仔賽後31戰得48分排第6，愛華頓少兩分排第7。