完場前個爭議性判決，係球迷奇遇記。
(©AFP)
【Now Sports】果然係今輪英超壓軸好戲，由蘇保斯拿爾百步穿楊開始，到佢領紅牌被逐變「紅」人，連埋補時呢半個鐘（見附表），好睇過戲。
撰文：球十三
利物浦被曼城反勝，事後最多人講一定係完場前個爭議性判決，係球迷奇遇記。卓基射空門入網，過程中，蘇保斯拿爾追賀蘭時拉衫，超越賀蘭，但個波其實繼續慢溜去龍門，球證本來吹得益，之後又輪到賀蘭拉住蘇保斯拿爾，咁個得益就難成立，吹番轉頭。
於是，出現依家觀感上奇怪，結果好似冇贏家嘅局面──卓基入被扼殺、蘇保斯拿爾被趕出場。
「佢（蘇保斯拿爾）拉我，然後我拉佢。」賀蘭賽後講出主觀願望，係入球成立，蘇保斯拿爾唔使被趕出場。換轉喺利物浦角度相信亦一樣，到嗰刻都大局已定，如果有得揀，大概亦寧願入球成立，Szobo唔使領紅牌同停賽。
蘇保斯拿爾被公認腳下功夫了得，一次又一次證明射罰球勁，季初就係佢射破阿仙奴不敗身。上個月，佢喺英格蘭足總盃對班士利又做主角，先入靚波，之後輕率喺一次回防中推波返自己禁區甩腳，累球隊失波，賽後俾人鬧到飛起。之後，佢又喺歐聯大勝馬賽場波射罰球，趁對方排人牆嘅球員跳起射地波破網，相當機警。
呢個匈牙利好波之人，娛樂性豐富，恨不我時時見佢落場，停賽唔止對佢，亦係球迷損失。
利城戰30分鐘峰迴路轉：
74分鐘
蘇保斯拿爾主射自由球中內柱彈入網，先開紀錄。
84分鐘
賓拿度施華接應賀蘭頭球二傳近門快腳篤入扳平。
90+3分鐘
賀蘭射入12碼令曼城反超前。
90+9分鐘
麥卡里士打勁射救當拿隆馬擋出底線。
90+13分鐘
曼城卓基射球入空門，不過蘇保斯拿爾在過程中扯跌賀蘭，被球證出示紅牌驅逐離場。
撰文：球十三
足球迷叫第十二人，冇偏愛，冷眼旁觀係十三。
