伍家朗已盡全力發揮。
(官方圖片)
【Now Sports】羽毛球港隊於全運會男團E組最後一戰不敵湖北，無緣晉級4強爭牌，老大哥伍家朗賽後在個人社交平台發帖抒發當中的遺憾。
現年31歲的伍家朗表示，「闊別左（咗）一屆，事隔8年再參加全運，好可能都係我最後一屆既（嘅）全運，出發之前我同身邊人或者同一啲傳媒都有講過其實今屆我最大既（嘅）心願就係可以喺男子團體企到上頒獎台，因為我覺得我地既（嘅）陣容係真係有條件可以做得到，而且香港隊喺無論國際賽事或者全運會上面攞到團體賽獎牌既（嘅）機會真係唔多。」
港隊最終3勝2負排E組第3，小組首兩名出線席位由江蘇及浙江奪得，家朗坦言已盡力做好「老大哥」角色，「作為一個喺團隊入面資歷比較深既（嘅）球員，我時刻都提醒自己要肩負起責任喺每場比賽都做到最好，希望每次上場都幫到球隊獲勝，即使我遇到實力唔及對手既（嘅）時候都要盡力打出士氣，拼搏到最後，等隨後上場既（嘅）隊友都可以保持住好既（嘅）精神力應戰，哩（呢）個永遠都係打團體賽永恆不變既（嘅）道理，亦都係我一直以嚟打團體賽既（嘅）宗旨。」
稍後將出戰男單賽事的伍家朗表明，當下仍要為男團下馬調整心態，「出局已成定局，以後都未必再有下一次全運男團，即使有，四年後亦唔再係同一班戰友。有啲遺憾就係咁，可能永遠都冇辦法修補，就算而家萬念俱灰都只可以盡量提醒自己生活仍然要繼續，努力抬起頭向前看，不過人非草木，都需要啲時間去消化下哩（呢）份失落感。」
