喜鵲以眾凌寡。
(©AFP)
【Now Sports】紐卡素憑東拿利和基馬尼斯上、下半場的入球，主場2:0擊敗10人應戰的車路士。
周日紐卡素對車路士的英超比賽，雙方為來季歐聯席位爭戰，結果開波2分鐘主隊即有波入。東拿利前場逼搶成功，輾轉間皮球落在右路的積及梅菲傳中，最終由入楔禁區的東拿利門前掃入，紐卡素領先1:0。領先後的紐卡素繼續氣勢凌厲，控球比率力壓車路士，19分鐘伊薩禁區無人看管下埋門卻炒高；車路士去到20及24分鐘先有高爾彭馬及摩西斯卡斯度的遠射作埋門，但無功而還。
尾段35分鐘尼高拉積遜一次中圈附近位置頂波用手肘批中對方球員，球證檢視VAR後改判紅牌，車路士少打一人。紐卡素隨即有丹般禁區頭槌埋門，但柱邊出界；臨完場43分鐘丹般再有一次頭槌機會，但都未能轉化為入球下，紐卡素半場領先1:0返回更衣室。
下半場車路士換入域斯占士，並放手一搏，其中古古尼也在左路非常活躍，助攻埋門都有，唯獨只欠入球，紐卡素失勢下屯重兵後防做防守，戰至69分鐘才有基馬尼斯右路近柱抽射炒高，算是具威脅的埋門。尾段車路士換入山曹及古斯度加強攻力，81分鐘安素費蘭迪斯左路近射，樸比僅僅單手撲出底線；87分鐘域斯占士禁區頭槌埋門又出界。結果紐卡素90分鐘基馬尼斯一下禁區頂遠射省中人笠死門將，最終主場2:0擊敗車路士。
