奧比馬田缺陣 紅魔歐霸靠晒海倫？

【Now Sports】曼聯於英格蘭足總盃出局後，今季只餘下歐霸盃可爭，面對紅魔鬼狀態起伏不定，以及傷兵不少情況，領隊阿摩廉起用年輕小將為球隊帶來一些新衝擊無可厚非。不過，曼聯周四歐霸盃16強淘汰賽作客西班牙對皇家蘇斯達，肯定缺小將奧比馬田。

由於22歲的丹麥前鋒海倫（Rasmus Hojlund）今季狀態低沉，35場比賽只入7球，令到阿摩廉急切求變，以解決隊中士哥手入波少問題，而年輕翼鋒阿麥迪亞路收咧後，攻擊力更出現問題，只有隊長般奴費蘭迪斯及眾後衛取得士哥，故日前英足盃鬥富咸，阿摩廉再以年輕鋒將奧比馬田（Chido Obi-Martin），入替態沉的海倫。

17歲的奧比馬田雖然上陣3場未有入波，但由於阿摩廉急需在鋒線上找來新血，故唯有派遣其上陣。不過，周四歐霸盃作客皇家蘇斯達，奧比馬田在歐洲足協條例下，B隊成員未足夠加盟兩年，不合乎披甲資格，阿摩廉唯有再重用海倫，少了一個可改變戰局的變數。當然，海倫於今屆歐霸盃演出頗令人信任，上陣8場取得5個入波，看來阿摩廉爭取唯一錦標希望，靠這位丹麥國腳了。