巴黎奧運是謝影雪和鄧俊文最後一次合作的奧運。
(Instagram截圖)
【Now Sports】香港羽毛球代表謝影雪與拍擋鄧俊文以混雙8強的成績為巴黎奧運之旅作結。經過一日的沉澱，謝影雪在社交媒體抒發心聲，坦言首個賽後分享是多謝自己。
第4次征戰奧運的謝影雪在社交媒體Instagram透露自年初開始，就受到傷患困擾。她在1月接受治療時出現藥物敏感，兩邊膝蓋腫痛到難以行走，兩日之間於醫院抽出「幾樽水」。
正當阿雪以為康復，能夠全心備戰奧運之際，6月卻確診類風濕關節炎，她選擇食藥止痛繼續練習。只是天意卻繼續挑戰阿雪對奧運決心：「壞嘅事好似接二連三出現，一日後膊頭第8次甩骹，嗰一刻好崩潰……好記得麻醉藥後，我問容醫生我仲去唔去到奧運，之後佢好有信心同我講無問題！令我本身由好崩潰變得安心落嚟。」
直言「點解好似好多事阻止我去巴黎」的阿雪可謂對巴黎奧運又愛又恨，她透露：「等左（咗）好耐最後一屆奧運，一方面我好想去享受，一方面又好想奧運快啲完，因為好期待整個人可以放鬆落黎（嚟）嘅一刻。呢三年我覺得整個人已經谷到我自己嘅極限。」
「好多謝自己堅持咗咁耐，我覺得呢啲事比以前嘅謝影雪遇到，可能已經一早放棄咗……我都要好多謝我嘅身體，多謝你18年來比（畀）我用到五勞七傷，抱歉無將你哋照顧好，我以後會更愛錫自己了。」阿雪最後如此總結今趟巴黎之旅。
