安巴比鋒芒不及也馬。
(©AFP)
【Now Sports】隨著法國出局，被寄予厚望嘅巨星安巴比，黯然結束一個相當唔順意嘅球季。
撰文：球十三
大賽年，金球獎評選好大程度取決於歐洲國家盃或者美洲國家盃表現，所以當法國出局，第一時間諗到今年又唔使預安巴比（Kylian Mbappe）。無人會懷疑佢嘅能力，盤球技術同速度嚇死你，只係過去一個球季實在好唔順。喺巴黎聖日耳門一早有離心，想加盟皇家馬德里之心昭然若揭，於是PSG教練安歷基時而將佢雪藏或只畀佢踢後備。
PSG喺法甲如常橫掃，到歐聯殺入4強好衰唔衰遇到突然大勇嘅多蒙特，安巴比面對侯姆斯為首嘅防線真係一戙都無，俾蜜蜂螫死。嚟到EURO，以為已經落實過檔皇家馬德里，無後顧踢大賽，點知第一場鬥奧地利就掛彩撞爆鼻，慘變鐵面王子，成屆賽事冇幾多腳好波，埋單得1個12碼入波、兩次助攻咁大把，今場鋒芒盡被也馬蓋過，點計都唔合格。
佢賽後聲稱失敗，不過佢好快又會對番呢班狂牛兵，期待佢再大戰也馬，西甲見。
撰文：球十三
足球迷叫第十二人，冇偏愛，冷眼旁觀係十三。