【Now Sports】啱啱睇完一場極富張力同戲劇性嘅比賽,但見基斯坦奴朗拿度破涕為笑,就想起已故嘅林振強先生嘅著作書名《又喊又笑》四字。好似C朗呢種咁執著,對自己要求咁高嘅人,喊出嚟真係好啲。
撰文:球十三
好睇嘅球賽,唔一定需要入球,葡萄牙啱啱淘汰斯洛文尼亞,有精彩埋門、41歲老將比比加時頂唔住甩轆俾人單刀,最緊要係睇到基斯坦奴朗拿度(Cristiano Ronaldo)嘅眼淚同笑容,仲有迪奧高哥斯達連救3球12碼,捱夜都抵。
葡萄牙加時獲得12碼,十三嗰刻即時諗,C朗今日頭鎚唔得罰球又唔得,咁唔順,唔知會唔會讓畀般奴費蘭迪斯操刀呢?反正分組賽都試過近門選擇唔射而傳畀般奴入波。結果當電視熒幕顯示佢之前13球12碼全中嘅數據,轉過頭就見佢大踏步準備主踢……
佢主踢前,好似之前射罰球咁又起勢唞大氣,就算咩風浪咩大場面見盡,原來一樣咁緊張。佢射得唔太差,係奧比勒捉到路;當佢宴客,即時兩眼通紅,展現悲痛舉措。忍唔住啦,嗰種失望連埋長久以嚟所承受嘅壓力,喺呢個moment,要爆啦。
同廿年前決賽輸波後爆喊唔同,當年係初出茅廬承受唔到主場輸波失盃,佢今次喊,固然因為宴客,亦因為長期承受千斤重壓力。3場分組賽食白果,你估佢唔知開始有聲音叫佢讓出正選位咩?今屆幾場波見佢都拼搏肉緊,不過多次盤扭埋門都有啲力不從心,相信連球迷都為佢擔心。夠啦,唔應該再強求好似全盛期咁逢人過人、腳腳七注。
再聽佢賽後講「這一年,我沒有犯過任何一個錯誤……」就知佢對自己要求有幾高。學教練馬天尼斯賽後話齋,佢始終係一代名將,到互射12碼依然第一個負責操刀,勇!今次把握得好,再加埋有個咁擅救12碼嘅隊友,晉級啦,破涕為笑。
唔好谷住谷住,喊出嚟好啲,佢個包袱太重啦,今次經歷,咁樣喊一喊、鬆一鬆未嘗唔係一件好事。佢大概明白自己其實係可以犯錯,球隊唔需要佢單天保至尊,眾隊友根本有實力一齊承擔,贏波晉級。經此一戰,葡萄牙肯定士氣更高更團結,而只要佢放低包袱,輕裝上陣、優雅素淡棄掉多年建立嘅神龕,入球或者好快出現,而葡萄牙可以走得更遠。
撰文:球十三
足球迷叫第十二人,冇偏愛,冷眼旁觀係十三。