當拿隆馬屢救險球。
(©AFP)
【Now Sports】唔係跌落地揦返拃沙，意大利輸畀今屆到目前為止踢得最好嗰隊，無話可說。唯一安慰係，當拿隆馬最後都冇被西班牙球員射破十指關，等我哋可以自high。
撰文： Malena（燕飛）
意大利大部份時間捱打，迪羅倫素俾歷高威廉斯搞到疲於奔命，下下都要費達歷高基艾沙幫拖。當拿隆馬夠勁，加埋夠運上半場至唔輸。相信其他意大利球迷半場時諗法同我一樣——咁樣守落去唔係辦法，果然下半場輸球烏龍波……
半場休息時我仲諗緊，佐真奴活力唔夠但控球能力同傳波好，應唔應該留底？史巴利堤好快畀到答案我，不過睇佢之後換入嘅球員唔見得好大威脅，最後廿分鐘左右開始積極進取，係有機會但都把握唔到，進攻板斧同人材都唔夠，唔係條橫楣仲可能輸多球。最擔心巴利拿，聽講佢決賽周開波前受傷，上半場跳起半空撻落地嗰下，真心驚佢傷上加傷。佢呢兩場踢得淡定，保護到腳下球又射得，成隊意大利只有佢同當拿隆馬（Gianluigi Donnarumma）一樣，唔傷得。
客觀講西班牙球員控球同傳送超強，好蝦人踢，係決賽周最具冠軍相嘅一隊。依家只希望意大利之後一路贏，入決賽再同隻牛死過。講多句，唔係太喜歡意大利呢件白衫，有啲娘娘腔冇少份剛陽氣，似睇女人踢波。女人比較鍾意睇男人踢波，至少我係。
撰文： Malena（燕飛）
現在我老了，人家才說「你很好」。